बाराको डुमरवानामा खाना पकाउने ग्याँस सिलिण्डर लिक हुँदा एकै परिवारका चारसहित सात जना घाइते भएका छन् । घाईतेहरु मध्ये तीन जनाको अवस्था गम्भीर रहेको प्रहरीले जनाएको छ ।

बाराको जीतपुरसिमरा उपमहानगरपालिका वडा नम्बर १४ डुमरवाना स्थित स्याउली बजारको नरमान थिङ्गको घरमा ग्याँस सिलिन्डर लिक भएर सो दुर्घटना भएको हो । घटनामा परि ६७ वर्षीय नरमान थिङ्ग, उनकी बुहारी ३२ वर्षीया ज्ञानी मायाँ थिङ्ग , ३२ वर्षीय बौद्धमान थिङ्ग र ३२ वर्षीय अनिता थिङ्ग घाइते भएका छन् ।

त्यसैगरी छिमेकीहरु ५२ वर्षीया दिल्ली माया वाईबा, ५५ वर्षीया साई माया वाईबा, ३२ वर्षीया दिलमाया वाईबा पनि घाइते भएका छन् । घाईते मध्ये चार जनाको सिमरास्थित अल्पाईन अस्पतालमा उपचार भईरहेको छ भने गम्भीर घाईते तीन जनाका वीरगंजस्थित नेशनल मेडिकल कलेजमा उपचार भइरहेको छ ।

उनीहरुको शरीरको विभिन्न भाग र कपाल जलेको छ । प्रहरीका अनुसार रेगुलेटर जोड्ने क्रममा ग्याँस लिक भएको र आगो सल्किएको बताइएको छ ।