प्रधानमन्त्री केपी शर्मा ओलीले सिंगापुरबाटै मन्त्रिपरिषद बैठकको अध्यक्षता गरेकामा प्रतिपक्ष दल नेपाली कांग्रेसले आपत्ति जनाएको छ ।
राष्ट्रियसभाको बिहीबारको बैठकमा कांग्रेस सांसद राधेश्याम अधिकारीले प्रधानमन्त्रीले भिडियो कन्फेरेन्सको माध्यमबाट मन्त्रिपरिषद बैठकको अध्यक्षता गरेकामा आपत्ति जनाएका हुन् ।
उपचारका लागि सिंगापुर गएका प्रधानमन्त्रीले मन्त्रिपरिषद बैठकको अध्यक्षता भिडियो कन्फेरेन्सबाट गर्नु आपत्तिजनक भएको अधिकारीको भनाइ थियो ।
कार्यवाहक प्रधानमन्त्री भनेर राष्ट्रपतिले नै कामको जिम्मेवारी दिएको चिठी सदनमा वाचन गरिएको भन्दै अधिकारीले प्रधानमन्त्रीको शैलीप्रति आपत्ति जनाए । उनले भने, ‘अब कार्यवाहक प्रधानमन्त्री हुनुहुन्छ कि हुनुहुन्न?’
प्रधानमन्त्रीले विदेशमा रहेको बेला मन्त्रिपरिषद बैठकको अध्यक्षता गर्नु कानुन विपरीत भएको पनि अधिकारीले बताए । गतसाता प्रधानमन्त्रीले सिंगापुरबाटै भिडियो कन्फरेन्समार्फत मन्त्रिपरिषद बैठकलाई सम्बोधन गरेका थिए ।
