टिकट बुकिङ खुला भएयता १२ लाख यात्रु दसैंका लागि उपत्यकाबाट बाहिरिएका छन् ।
दसैंमा घर जाने यात्रुको दैनिक टिकट काउन्टरमा भीड लाग्ने गरेको छ । असोज ५ गतेबाट टिकट बुकिङ खुला भएको हो । बुधबारसम्म ११ लाख ९१ हजार ९ सय ८८ यात्रु बाहिरिएका महानगरीय ट्राफिक प्रहरी महाशाखाका प्रमुख एसएसपी भीमप्रसाद ढकालले जानकारी दिए ।
जसमा १ लाख ३७ हजार ८७ वटा सवारी साधन यात्रु बोकेर बाहिरिएको उहाँले बताउनुभयो । त्यस्तै यात्रुसँग बढी भाडा लिने २ सय ३२ जनालाई कारबाही गरिएको छ । एसएसपी ढकालका अनुसार उपत्यकाका १४ स्थानमा यात्रुलाई सहजता प्रदान गर्न नागरिक सहायता कक्ष राखिएको छ ।
नयाँ बसपार्कबाट बाहिरिने गाडीको अनिवार्य रूपमा यान्त्रिक परीक्षण गर्ने गरिएको छ । यात्रु लिएर हिँडेका गाडीलाई मादक पदार्थ सेवन गरेको छ छैन भनेर चेकजाँच गर्ने गरिएको छ । गाडीमा अनिवार्य रूपमा भाडादर टाँस्न लगाइएको ट्राफिक प्रहरीको दाबी छ ।
नागढुंगाबाट बाहिरिने हरेक गाडी र चालकको फोटो खिच्ने गरिएको छ । क्षमताभन्दा बढी यात्रु बोक्ने ३८ वटा सवारी साधन कारबाहीमा परेका छन् ।
