आश्विन शुक्ल नवमीका दिनमा मनाइने महानवमी पर्व आज हर्षोल्लासका साथ सिद्धिदात्रीको पूजा आराधना गरी बलि दिएर मनाइँदैछ ।

घटस्थापनाका दिनमा रााखिएको जमरा आज विभिन्न शक्तिपीठमा चढाइने गरिन्छ । दशैँघर र कोत लगायत विभिन्न देवीका मन्दिर र शक्तिपीठहरुमा बोका, हाँस, कुखुरा, भेंडा र राँगाको बलिसहित विशेष पूजाअर्चना गरिन्छ ।

शाकाहारीहरूले भने कुभिन्डो, घिरौँला र मूला लगायतको बलि दिने र नरिवल चढाउने गर्छन् ।यसैगरी काठमाडौंको हनुमानढोकास्थित तलेजु मन्दिर आज खुला गरिएको छ । वर्षको एक दिन बडादसैंको महानवमीका दिनमात्र खुल्ने तलेजु भवानीको मन्दिरमा आज बिहान विशेष पूजापाठ गरिएको छ ।

तलेजु भवानीको दर्शन गर्न आउने भक्तजनहरुको घुइँचो लागेको छ । नेवार समुदायको इष्टदेवीकारुपमा लिइने तलेजु भवानीको दर्शनका लागि उपत्यका वरपरबाट थुप्रै दर्शनार्थी आएका छन् । सन् १३२५ मा भारतीय मुसलमान शासकले हरिहरसिंहको राज्य सिम्रौनगढमा आक्रमण गरेपछि आक्रमणबाट बच्न उनी देवीसहित भक्तपुर आएको इतिहासमा उल्लेख छ ।

सत्रौं शताब्दीमा राजा जयप्रकाश मल्लले तलेजु भवानीसँग त्रिपासा खेल्नेक्रममा कुदृष्टिले हेरेपछि तलेजु भवानी मन्दिरबाट हराएकी थिइन् । राजाले क्षमा माग्दै धेरै रोइकराइ गरेपछि तलेजु भवानीले ‘वर्षको एकपटक महानवमीको दिनमात्र आउने वचन दिएको किंवदन्ती रहेको छ ।

वसन्तपुरका साथै कीर्तिपुर, फर्पिङ, साँखु, ठिमी, चापागाउँ, नुवाकोट, दोलखा, बनेपा, पनौतीलगायत ठाउँमा पनि तलेजु भवानीको पूजा–आराधना गरिन्छ । आजकै दिन सवारीसाधनको पूजा अर्चना पनि गरिन्छ।