अफगानिस्तानको एक मस्जिदमा भएको बम विस्फोटमा परि कम्तीमा ६२ जनाको मृत्यु भएको छ ।
पूर्वी नानगहर प्रान्तमा रहेको एउटा मस्जिदमा शुक्रबारको नमाज पढिरहेका बेला बम विस्फोट भएको हो । विस्फोटमा परि ३६ जना घाईते भएका छन् । विस्फोटका कारण मस्जिदको छतसमेत खसेको छ ।
उक्त क्षेत्रमा चरमपन्थी समूह इस्लामिक स्टेट र तालिबान दुवै सक्रिय छन् । तर दुवैले अहिलेसम्म विस्फोटको जिम्मेवारी लिएका छैनन् । प्रान्तीय राजधानी जलालाबादबाट ५० किलोमिटर पर रहेको हस्का मिना जिल्लाको एउटा मस्जिदमा विस्फोट भएको नानगहर प्रान्तका गभर्नर अताउल्लाह खोग्यानीले जानकारी दिए ।
संयुक्त राष्ट्रसङ्घले अफगानिस्तानमा हिंसाको स्तर अस्वीकार्य भएको जनाए लगत्तै यो विस्फोट भएको हो । संयुक्त राष्ट्र संघका अनुसार गएको जुलाईदेखि सेप्टेम्बरसम्म कम्तीमा ११७४ नागरिक मारिएका छन् ।
यसमा २०१९ को जुलाई महिना यो दशककै सबैभन्दा रक्तपातपूर्ण महिना सावित भएको छ ।
