प्रधानमन्त्री केपी शर्मा ओली डिस्चार्ज भएका छन् ।
बुधबारदेखि ग्राण्डी अस्पतालमा उपचाररत प्रधानमन्त्री ओली बिहीबार साँझ ८ बजे डिस्चार्ज भएका हुन् । बुधबार र बिहीबार गरेर २ पटक मिर्गौलाको डायलाइसिस गराएका ओली आफै हिँडेर हँसिलो मुद्रामा अस्पतालबाट बाहिरिएका थिए ।
अस्पतालबाट बाहिरिँदै गर्दा प्रधानमन्त्री ओलीले सञ्चारकर्मीहरुलाई धन्यवाद दिँदै आफू ठिक भएको बताएका थिए । प्रधानमन्त्री ओली अस्पतालबाट सोझै बालुवाटार गएका थिए । यसअघि साँझ अस्पतालमा नै पत्रकार सम्मेलन गर्दै अस्पतालका मेडिकल डाइरेक्टर चक्रराज पाण्डेले प्रधानमन्त्री ओलीको स्वास्थ्य सामान्य रहेकाले डिस्चार्ज गर्ने तयारी गरिएको बताएका थिए ।
बुधबार र बिहीबार गरेर दुई पटक डायलासिसअन्तर्गत पर्ने अल्ट्रा फिल्ट्रेसन गरेर उपचार गरिएको अस्पतालले जनाएको छ । बिहीबार दिनभर प्रधानमन्त्री ओलीलाई भेट्न नेकपाका अध्यक्ष पुष्पकमल दाहालसहित मन्त्री तथा नेताहरु अस्पताल पुगेका थिए ।
