नेपाल कम्युनिष्ट पार्टी(नेकपा)का अध्यक्ष पुष्पकमल दाहाल प्रचण्डले अब सरकारको कामको गति बढ्ने बढ्ने बताएका छन् । बिहीबार धनगढीमा पत्रकारहरुसँग कुरा गर्दै अध्यक्ष प्रचण्डले मन्त्रीमण्डलको पुनर्गठन भएकाले सरकारको गति बढ्ने बताएका हुन् ।
उनले नयाँ मन्त्रीहरुले जनताको आकांक्षा पुरा गर्नुहुन्छ भन्ने विश्वास पार्टीले लिएको बताए । उनले जनताको भावना अनुसार नै सीमाका बारेमा सरकारले भारतलाई चिठी लेखेको स्पष्ट पारे ।
उनले वार्ता र छलफलबाटै सीमा विवाद समाधान गर्नुपर्ने र सुरुमा नै यस बिषयलाई अन्तराष्ट्रियकरण गर्न नहुने आफूले बताएको उल्लेख गरे ।
उनले नेपालका लागि भारतीय पूर्वराजदूत श्यामशरणले यस बिषयलाई राजनीतिकरण गर्न नहुने भन्ने दिएको वक्तव्य उचित नभएको बताए । उनले भने, ‘सीमा विवादलाई राजनीतिकरण देख्ने श्यामशरणको दृष्टिदोष हो।’
