काठमाडौँ । प्रमुख प्रतिपक्षी दल नेपाली कांग्रेसले सरकारले ल्याउन लागेको सूचना प्रविधि विधेयक र नेपाल विशेष सेवा गठन र सञ्चालन सम्बन्धी कानुन विरुद्ध देशभरका जिल्ला प्रशासन कार्यालयमार्फत् आइतबार सरकारलाई विरोधपत्र बुझाएको छ ।
७७ वटै जिल्ला प्रशासन कार्यालयमार्फत् विधेयक सच्याउन माग गर्दै कांग्रेसले सरकारलाई विरोधपत्र बुझाएको हो । केन्द्रीय कार्यसमितिले तय गरेको मितिमा विरोध पत्र बुझाउन असम्भव भएपछि शुक्रबार बसेको संसदीय दलको बैठकले आइतबार बुझाउने निर्णय गरेको थियो ।
काठमाडौं जिल्ला कार्यसमितिले भने साढे १२ बजे माइतीघर मण्डलामा जम्मा भएर र्यालीसहित विरोधपत्र बुझाएको छ । कांग्रेस प्रवक्ता विश्वप्रकाश शर्माले दुई विधेयकमा संविधानप्रदत्त नागरिक अधिकार हनन हुने खालका प्रावधान राखिएकाले सच्याउन माग गर्दै विरोधपत्र बुझाएको जानकारी दिए । विरोधपत्रमा संविधानविपरीतका अन्य गतिविधि पनि सच्याउन माग गरिएको छ ।
