काठमाडौं । अख्तियार दुरुपयोग अनुसन्धान आयोगले बालुवाटारस्थित ललितानिवास जग्गा प्रकरणमा १ सय ७५ जनालाई प्रतिवादी बनाउँदै विशेष अदालतमा मुद्दा दायर गरको छ ।
अक्तियारले यसरी १ सय ७५ जनालाई प्रतिवादी बनाउँदा सर्वोच्च अदालतका न्यायाधीश कुमार रेग्मी र नेकपा महासचिव विष्णु पौडेलका छोरा नवीन पौडेललाई भने क्लिन चिट दिएको छ ।
आयोगले विशेष अदालतमा दायर भएको मुद्दामा १ सय ७५ जनालाई प्रतिवादी र ६५ जनालाई ‘जग्गा जफत गर्ने प्रयोजनका लागि मात्र’ प्रतिवादी बनाएको छ ।
तर, बहालवाला न्यायाधीश रेग्मी र नेतापुत्र पौडेललाई भने ‘जग्गा जफत गर्ने प्रयोजनका लागि’ समेत प्रतिवादी बनाइएको छैन ।
यसबारे आम सर्वसाधारणमा चासो देखिएको छ ।
बालुवाटारस्थित ललितानिवासको जग्गा नेपाल सरकारलाई फिर्ता गर्न न्यायाधीश कुमार रेग्मी र नेकपाका महासचिव विष्णु पौडेलका छोराले सहमति जनाएपछि उनीहरूलाई अक्तियारले प्रतिवादी नबनाएको हो ।
उता कसैले भ्रष्टाचार गरेको सम्पत्ती फिर्ता गरे मुद्दा नचलाउने नजिर स्थापित हुने भ्रष्टाचार विरोधी अभियानकर्मीहरूले धारणा व्यक्त गरेका छन् ।
