जनकपुर । नेपाली कांग्रेसका उपसभापति विमलेन्द्र निधिले सरकार भ्रष्टाचारमा डुबेको रहस्योद्घाटन हुन थालेको जिकिर गरेका छन्।
धनुषाको नगराईन नगरपालिक–५ गंगुलीमा शुक्रबार शिव मन्दिरको उद्घाटन गर्दै उपसभापति निधिले भने, ‘प्रधानमन्त्रीज्यू भन्ने गर्नुहुन्थ्यो- अब लुटिङ फ्यासिलिटी अन्त्य भइसक्यो। तर, उनकै घरमा बस्ने एकजना विश्वासपात्रले हिजै राजीनामा गर्नु भएको छ।’
उपसभापति निधिले प्रधानमन्त्रीको घर र कार्यालय दुवै ठाउँमा लुटिङ भइरहेको टिप्पणी गरे।
‘प्रधानमन्त्रीज्यूको घर र कार्यालयमा लुटिङ भइरहेको छ। मुलुक भ्रष्टाचारको खाडलमा फस्दै छ, लुटिङ गर्नेलाई आज भगवान शिवले सबैको संहार गरुन्, म आग्रह गर्न चाहन्छु।’
अहिलेको कम्युनिस्ट सरकार संघीयता र संविधान मास्नतर्फ उद्यत रहेको भन्दै निधिले यसको रक्षा गर्न सबै नेपाली एकजुट हुनुपर्नेमा जोड दिए।
‘कम्युनिस्टहरु गणतन्त्र र संघीयतामाथि विश्वास गर्दैनन्, अहिलेको सरकार संविधान मास्नतर्फ अघि बढिरहेको छ, यसलाई जोगाउन हामी सबै एकजुट हुनुको विकल्प छैन,’ निधिले भने।
