काठमाडौं । नेपाली कांग्रेसले लकडाउनकै बीच सरकारले ल्याएको अध्यादेश विरुद्ध सडकमा आएको छ ।
सामाजिक दूरी कायम राख्दै बानेश्वरस्थित संसद भवन अगाडि कांग्रेसका युवा नेता रञ्जित कर्णको नेतृत्वमा विरोध प्रदर्शन गरिएको हो । प्रदर्शनका क्रममा उनीहरूले विवादित २ अध्यादेश तत्काल खारेज गर्न माग गरेका छन ।
सो क्रममा कांग्रेस नेता कर्णले लोकतन्त्र नै संकटमा परेका कारण लोकतन्त्र दिवसकै दिन प्रदर्शन गरिएको बताए ।
जस्तोसुकै कठिन परिस्थितिमा पनि लोकतान्त्रिक मूल्य मान्यताको रक्षा गर्नु कांग्रेसको कर्तव्य रहेको भन्दै नेता कर्णले सामाजिक दूरी कायम राखेर सरकारविरुद्ध अझ कडा प्रर्दशन गरिने बताए ।
प्रदर्शनमा युवा नेता क्षितिज भण्डारी, विद्यार्थी नेताहरु ऋषि कोइराला, योगेश भट्ट, बिनोद शाही ठकुरी, महेन्द्रराज जोशी, भूपेन्द्र जोशीलगायत उपस्थित थिए ।
