काठमाडौं । कर्णाली प्रदेशका मुख्यमन्त्री महेन्द्रबहादुर शाहीले केपी ओलीपक्षका दुई मन्त्रीलाई हटाउने भएका छन् ।
स्रोतका अनुसार ओली पक्षका सामाजिक विकास मन्त्री दल रावल र उद्योग, पर्यटन तथा वन, वातावरणमन्त्री नन्दसिंह बुढालाई बर्खास्तीमा पर्ने छन् ।
यसखघि बैंकिङ कसुरमा परेका भौतिक पूर्वाधार विकास मन्त्री खड्कबहादुर खत्रीलाई हटाएको थियो । उनी पनि ओली पक्षबाटै मन्त्री बनेका थिए ।
स्रोतका अनुसार नयाँ बन्ने मन्त्रीहरुमा चन्द्रबहादुर शाही, करबिर शाही र अमरबहादुर थापा छन् ।
मुख्यमन्त्री शाहीले बर्खास्ती गर्ने पूर्वसूचना पाएपछि सामाजिक विकास मन्त्री दल रावलले पद त्यागेको जानकारी सामाजिक सन्जालमार्फत् दिएका छन् ।
उनले फेसबुकमा लेखेका छन्, ‘कर्णाली प्रदेश सरकारको सामाजिक विकास मन्त्रीको हैसियतले ३२ महिनाको अवधिमा मन्त्रालयलाई नवजात अवस्थाबाट शिशु अवस्थामा पुर्याउन प्रत्यक्ष वा परोक्ष रूपमा सहयोग गर्नुहुने समआदरणीय महानुभावहरुप्रति ऋणी छु ।’
राजीनामा नदिन ओलीको निर्देशन
मुख्य मन्त्री शाहीले बर्खास्त गर्न थालेको थाहापाएपछि समाजिक संजालबाट राजिनामा दिन थालेपछि ओलीले आफ्नापक्षका मन्त्रीलाई राजिनामा नदिन निर्देशन दिएका छन् ।
ओली पक्षले आफूविरुद्ध अविश्वास प्रस्ताव ल्याएपछि मुख्यमन्त्री शाहीले यसअघि प्रमुख सचेतक गुलाबजंग शाहलाई पनि हटाएका थिए । यो प्रकरणमा पुष्पकमल दाहाल ‘प्रचण्ड’ र माधव नेपाल पक्ष एक ठाउँमा आएपछि कर्णाली प्रदेशमा ओली पक्ष अल्पमतमा परेको छ ।
