एजेन्सी । कोपा अमेरिका फुटबलको उपाधि अर्जेन्टिनाले हात पारेको छ । फाइनल आयोजक ब्राजिललाई एक शुन्य गोलअन्तरले पछिपार्दै अर्जेन्टिनाले उपाधि हासिल गरेको हो । माराकाना स्टेडियममा अर्जेन्टिनालाई उपाधि दिलाउन एन्जल डी मारियाले निर्णायक गोल गरे ।
खेलको २२ औं मिनेटमा डी मारियाले निर्णायक गोल गरेका हुन् । उनले रोड्रिगोको पासमा उत्कृष्ट गोल गरेका हुन् । ब्राजिलले खेल अवधिभर पटक पटक गोल गर्ने अवसर पाउँदा पनि त्यसको उपयोग गर्न नसक्दा हार व्यहोर्नुपरेको हो । ब्राजिलको पटक पटकको आक्रमणलाई अर्जेन्टिनाका गोलकिपरले छलेका थिए ।
योसँगै कप्तान लियोनल मेस्सीले अर्जेन्टिनाका लागि पहिलो अन्तराष्ट्रिय उपाधि जित्न सफल भएका छन् । यस अघि अर्जेन्टिनाले सेमिफाइनलमा कोलम्बियालाई पेनाल्टी सुटआउटमा तीन दुई गोलले पराजित गरेको थियो । ब्राजिलले भने पेरुलाई एक शुन्य गोल अन्तरले पराजित गर्दै फाइनल यात्रा तय गरेको थियो ।
