काठमाडौं । नेपाली कांग्रेसको पदाधिकारी र पूर्वपदाधिकारीको बैठक सुरु भएको छ । बैठक कांग्रेस सभापति शेरबहादुर देउवाको निजी निवासमा बुढानिलकण्ठमा बसेको हो । कांग्रेस सभापति तथा प्रधानमन्त्री देउवाले बिहीबार अबदेखि कांग्रेस बैठक प्रधानमन्त्रीको सरकारी निवास बालुवाटारमा नबोलाउने निर्णय गरेका हुन् ।
त्यसकारण आज बिहानै कांग्रेस शीर्ष नेता बुढानिलकण्ठ पुगेका थिए ।
सभापति देउवा प्रधानमन्त्री भएपछि कांग्रेसको बैठक पनि सरकारी निवास बालुवाटारमा बसेको थियो । तर, त्यसको सर्वत्र विरोध भएपछि देउवाले पार्टीको बैठक अबदेखि सरकारी निवासमा नराख्ने निर्णय गरेका हुन् ।
सोही कारण शुक्रबारको बैठक बुढानिलकण्ठस्थित सभापतिको निवासमा बोलाइएको हो । कांग्रेसको १४ औं महाधिवेशनको कार्यतालिका हेरफेर, क्रियाशील सदस्यता विवाद निवारण र निर्वाचन निर्देशिकाको बारेमा व्यापक छलफल गर्न कांग्रेसका पदाधिकारी र शीर्ष नेताहरुको बैठक बोलाइएको हो ।
बैठकले महाधिवेशनको कार्यतालिका हेरफेर हुन सक्ने निर्णय पनि हुन सक्ने आँकलन गरिएको छ । अहिलेसम्म कांग्रेसको वडा तहको अधिवेशन साउन १२ मा हुने कार्यतालिका यथावत छ । तर, त्यसको तयारी भने अहिलेसम्म एकरत्ति भएको छैन ।
कांग्रेसमा क्रियाशील सदस्यताको संख्या साढे नौ लाख पुगेको छ । वडा र क्षेत्रीय तहको अधिवेशनपछि सिधै केन्द्रीय महाधिवेशन गर्ने कांग्रेसको तयारी रहेको छ ।
