काठमाडौँ । जापानको राजधानी टोकियोमा जारी ३२औँ ग्रीष्मकालीन ओलम्पिक खेलकुदमा चीन ७४ पदकसहित शीर्ष स्थानमा कायमै रहेको छ । अमेरिका र जापानलाई उछिन्दै चीन शीर्ष स्थान ओगट्न सफल भएको हो ।

चीनले हालसम्म ३४ स्वर्ण, २४ रजत र १६ कास्य पदक प्राप्त गरेको छ । अमेरिका दोस्रो तथा जापान तेस्रो स्थानमा रहेका छन् । अमेरिकाले २९ स्वर्ण, ३५ रजत र २७ कास्य पदक प्राप्त गरेको छ भने जापानले २२ स्वर्ण, १० रजत र १४ कास्य प्राप्त गर्न सफल भएको छ ।

यस्तै अस्ट्रेलिया १७ स्वर्ण, पाँच रजत र १९ कास्य पदकसहित चौंथो स्थानमा छ । रसियन ओलम्पिक कमिटी पदक तालिकाको पाँचौँ स्थानमा उक्लिएको छ । उसले १६ स्वर्ण, २२ रजत र २० कास्य पदक प्राप्त गरेको छ । यसैगरी बेलायत १६ स्वर्ण, १८ रजत र १७ कास्य पदक प्राप्त गर्दै छैटौँ स्थानमा छ ।

जर्मनी ९ स्वर्ण, १० रजत र १६ कास्यसहित सातौँ, फ्रान्स सात स्वर्ण, ११ रजत र नौ कास्यका साथ आठौँँ, इटली सात स्वर्ण, १० रजत र १८ कास्य जित्दै नवौँ तथा नेदरल्याण्डस् सात स्वर्ण, नौ रजत र १० कास्यका साथ पदक तालिकाको १०औँ स्थानमा रहेको टोकियो ओलम्पिकको वेभसाइटमा उल्लेख छ । टोकियो ओलम्पिकमा सहभागी २०५ देशमध्ये हालसम्म ८८ देशले पदक प्राप्त गर्न सफल भएका छन् ।