स्याङ्जा । आर्थिक अवस्था कमजोर भएकी फुटबल खेलाडी शान्ता नेपालीलाई आर्थिक सहयोग प्रदान गरिएको छ । नेप्लेज मिडियाको पहलमा स्वदेश तथा विदेशमा रहेका विभिन्न संघ संस्था तथा ब्यक्तिहरुद्वारा संकलित रु. २ लाख ५९ हजार शान्ता नेपालीलाई हस्तान्तरण गरिएको हो ।
वालिङ नगरपालिका –८ मा डेरागरी बस्ने शान्ताको जग्गा जमिन नभएको र परिवारको आर्थिक स्थिति कमजोर भएपछि नेप्लेज मिडियाको पहलमा संकलन गरिएको रकम हस्तान्तरण गरिएको हो ।
उक्त सहयोग रकम वालिङ नगर प्रमुख दिलीपप्रताप खाँणले हस्तान्तरण गरेका हुन् । घरबारबिहीन शान्ताको परिवारलाई वालिङ नगरपालिकाले घर निर्माणका लागि करिब पाँच आना घडेरी खरिद गरिसकेको नगरप्रमुख खाँणले बताउनुभयो ।
‘खेल क्षेत्रमा गरिएको खर्च नभई लगानी हो’, प्रमुख खाँणले भन्छन्, ‘यसले तत्कालभन्दा पनि केही समयपछि मात्रै उपलब्धी दिने गर्छ ।’ खेलाडी तथा उसको परिवारका लागि आवश्यक सहयोग गर्न नगरपालिका सधैं तयार रहेको बताउँदै नगर प्रमुख खाँणले खेलाडीलाई जीवनयापनका लागि रोजगारीको अवसर र रु. एक लाखसम्मको निःशुल्क स्वास्थ्य बीमाको व्यवस्था गर्ने उल्लेख छ ।
“नगरपालिकाबाट खेल क्षेत्र तथा खेलाडीको क्षमता विकास तथा आवश्यक सहयोगका लागि पटक पटक रकम विनियोजन ग¥यौं”, नगर प्रमुख खाँणले भन्छन् ।
शान्ता फुटबल खेलप्रति अत्यन्तै रुचि राख्ने खेलाडी र राम्रो खेल खेल्दै आइरहेको तर घरायसी समस्याले खेल क्षेत्रबाट उदाउँदो खेलाडी गुमाउन नपरोस् भन्ने उद्देश्यले नगर प्रमुखसमक्ष गरेको अनुरोधको सुनुवाइ भएको प्रशिक्षक थापाले बताए ।
शान्ता महिला राष्ट्रिय लिगमा वालिङ नगरपालिकाको टिमबाट प्रतियोगितामा सहभागी अग्रपङ्क्तिकी खेलाडी हुन् । विभिन्न राष्ट्रिय खेलमा उनी सहभागी हुँदै आएकी छिन् ।
