काठमाडौं । नेपाल उद्योग परिसंघले विदेशी लगानीलाई सहजीकरण गर्न समिति गठन गरेको छ । परिसंघका उपाध्यक्ष हेमराज ढकालको नेतृत्वमा बर्जर पेन्ट्सका कन्ट्री म्यानेजर साइबल घोसको संयोजकत्वमा उक्त समिति गठन गरिएको हो ।
समितिको सह–संयोजकमा परिसंघका राष्ट्रिय परिषद सदस्य एवं सिटी एक्सप्रेस मनी ट्रान्सफरका प्रवन्ध निर्देशक चन्द्र टन्डन रहेका छन् । समितिमा गौरव गोयल सदस्य छन् । नेपालमा प्रत्यक्ष विदेशी लगानी भित्र्याउन असहज भएकाले सहजीकरणका लागि समितिले पहल गर्नेछ ।
यसैगरी समितिले नेपामला विदेशी लगानीका लागि उच्च प्रतिफलमुखी क्षेत्र पहिचान एवं सरोकारवाला निकायसँग नीतिगत सहजीकरणको काम पनि गर्नेछ । समितिको बैठकमा परिसंघका अध्यक्ष विष्णुकुमार अग्रवालले नेपाल लगानीको लागि उचित गन्तव्य रहेको भन्दै लैगानीकर्तामैत्री नीतिगत व्यवस्था हुनुपर्ने माग राखे ।
अध्यक्ष अग्रवालले लगानीका लागि असहज कानुनी व्यवस्था परिवर्तनका लागि समितिले आवश्यक पहल गर्नुपर्नेमा जोड दिए । समितिको बैठकमा उपाध्यक्ष ढकालले विदेशी लगानी भित्र्याउन आवश्यक सहजीकरणका लागि सरोकारवालासँग छलफल एवं अन्तरक्रिया अघि बढाउने प्रकट गरे ।
