काठमाडौं। निजी वायुसेवा कम्पनी बुद्ध एयरले बुधबारदेखि सिमरा–पोखरा उडान सुरु गर्ने भएको छ। कम्पनीले यी गन्तव्यमा भाडादर ४७ सय ७० रुपैयाँ तोकेको छ। कम्पनीका सूचना अधिकारी दीपेन्द्रकुमार कर्णका अनुसार आइतबार, बुधबार शुक्रबार गरी हप्तामा तीन दिन उडान हुनेछ ।
बिचक्राफ्ट जहाजमार्फत अहिले उडान गरिएको बताउँदै यात्रुको संख्या बढेमा एटीआर प्रयोग गरिने जनाइएको छ । ‘हामीले आन्तरिक पर्यटकलाई मध्यनजर गर्दै उडान तालिका बनाएका छौं।
यो उडानमा माग बढेसँगै एटीआरमार्फत उडान गर्ने योजना छ,’ उनले भने कम्पनीले दोस्रो निषेधाज्ञा खुकुलो भएसँगै विराटनगर–तुम्लिङटार, पोखरा–भरतपुर, पोखरा–भैरहवा लगायत गन्तव्यका लागि नियमित उडान गरिरहेको छ।
कम्पनीले हाल १० वटा ७२ सीट क्षमताको एटीआर–७२, ४२ सीटे तीन एटीआर–४२ र दुई बिचक्राफ्ट लगायत १५ वटा जहाजमार्फत मुलुकका विभिन्न ठाउँमा नियमित उडान गर्दै आएको छ ।
