काठमाडौं । बलिउड अभिनेता अमिताभ फिल्म सुटिङका लागि नेपाल आउने भएका छन् । नेपालमा बेलाबखत हलिउड–बलिउड फिल्मको छायांकन भइरहने गरेको छ ।
पछिल्लो समय नेपालमा छायांकन भएको हलिउड फिल्म ‘एभरेष्ट’ हो । त्यसअघि बलिउड फिल्म ‘बेबी’ र हलिउड फिल्म ‘डाक्टर स्ट्रेन्ज’लाई नेपालसँग कथा जोडेर छायांकन गरिएको थियो ।
नेपालमा ‘वेब सिरिज’को छायांकन हुने क्रम पनि बढ्दो रहेको पाइन्छ । यसैबीच नेपालमा फिल्म छायांकन गर्न बलिउड अभिनेता अमिताभ बच्चन आउने भएका छन् । भारतीय मिडियामा उल्लेख भए अनुसार उनी ‘उचाईँ’ फिल्मको छायांकनका लागि नेपाल आउन लागेका हुन् ।
पारिवारिक कथा बनाउन माहिर मानिने सुरज बडजात्याले यो फिल्मको निर्देशन गर्ने छन् । मित्रताको कथामा आधारित रहेर निर्माण हुने भनिएको फिल्ममा अमिताभसंगै अनुपम खेर, बोमन इरानी, नीना गुप्ता, पंकज त्रिपाठी लगायतको अभिनय रहनेछ ।
राजश्रीको व्यानरमा निर्माण हुने फिल्मका लागि अमिताभले ४० देखि ४५ दिन नेपालमा बिताउनेछन् । कोरोना भाइरसका कारण नेपालका फिल्मी क्षेत्र तहसनहस भइरेहका बेला बलिउडका सुपर स्टार अमिताभ छायांकनका लागि आउन लागेका छन् ।
