काठमाडौं । नेपाल राष्ट्र बैंकले नजिकिँदै गरेको दसैंका लागि नयाँ नोट सटही कार्य थालनी गरेको छ । राष्ट्र बैंकले काठमाडौं कार्यालयका साथै आफ्नो प्रादेशिक कार्यालयबाट नयाँ नोट वितरण सुरु गरेको हो ।
राष्ट्र बैंकले कोभिड संक्रमणलाई मध्येनजर गरी यसपाली चाँडै नोट सटही सुरु गरेको हो । यसपाली राष्ट्र बैंकले बैंक तथा वित्तीय संस्थाहरुलाई पनि दुई साता अगाडि नै नयाँ नोट उपलब्ध गराइसकेको छ । बैंक तथा वित्तीय संस्थाहरुले भने आफ्नो अनुकूलतामा नयाँ नोट सटही गर्ने भएका छन्।
राष्ट्र बैंकले पोहोर नोट नसाट्ने निर्णय गरेको थियो । यसपाली भने राष्ट्र बैंकले भिडभाड नहोस् भनेर बेलैमा नोट सटही सुरु गरेको हो । बैंक तथा वित्तीय संस्थाले भने अहिले नयाँ नोट मौज्दात गरेर राखेका छन्।
औपचारिक वितरण भने घटस्थापनादेखि गर्ने छन्। यद्यपि माग्न आउने आफ्ना नियमित ग्राहकलाई भने अहिले पनि उपलब्ध गराइरहेका छन् । राष्ट्र बैंकले यसपाली अधिकांश नोट नयाँ नै वितरण गरिदिएको छ । पोहोरपरार सुकिलो (एक÷दुई पटक प्रयोग भएको) नोट पनि वितरण गरेको थियो ।
राष्ट्र बैंकले बैंकहरुको एउटा शाखालाई कम्तिमा ५ करोड बराबरका दरले नयाँ नोट उपलब्ध गराएको छ। विकास बैंकहरुलाई ४ करोड र फाइनान्सलाई २ करोड बराबरको नोट उपलब्ध गराएको छ।
राष्ट्र बैंकले ५, १०, २०, ५० र १०० रुपैयाँ दरका नयाँ नोट उपलब्ध गराएको छ। बैंकहरुले प्रति ग्राहक १८ हजार ५०० रुपैयाँसम्म सटही सुविधा उपलब्ध गराउन सक्ने छन्।
