बोष्टन । अमेरिकाको म्यासाचुसेट्स राज्यको फल रीभरमा एक नेपालीको गोली हानी हत्या भएको छ ।
सोमबार राती १०:३० बजे ग्रोसरी स्टोरमा काम गरिरहेका लालकिशोर महासेठको गोली हानी हत्या भएको हो । स्टप एण्ड सेभ कन्भिनेन्स स्टोरका संचालक समेत रहेका महासेठको छातीमा गोली लागेको थियो ।
स्टोरमा समान किन्न आएका ग्राहकले महासेठको छातीबाट रगत बगेको देखेपछि ९११ नम्बरमा प्रहरीलाई खवर गरेका थिए ।
चाल्टन मेमोरियल अस्पताल पुर्याएका ५४ वर्षीय महासेठको अस्पतालले मत्यु भएको घोषणा गरेको थियो ।
मृतक महासेठ मधेसी एशोसिएशन (माँ) म्यासाचुसेस्ट् राज्यका वर्तमान सल्लाहकार तथा पूर्व अध्यक्ष हुन् । मृतकका श्रीमती र दुई छोराहरूका साथ स्टोर संचालन गर्दै फल रीभरमा बस्दै आएको माँ म्यासाचुसेस्ट्का अध्यक्ष चन्द्रदेव मण्डलले आजभोलीलाई जानकारी दिए ।
महासेठको मृत्युले समाजले एक असल समाजसेवी गुमाएको ग्रेटर बोष्टन नेपाली कम्युनिटि (जिबिएनसी)का अध्यक्ष मिलनकुमार कार्कीले बताए ।
मृतक महासेठको आत्माको शान्तीको कामना गर्दै जिविएनसी, माँलगाएतका संस्थाले शोक वक्तब्य निकालेका छन् ।
