काठमाडौं । सत्तारुढ दल नेपाली कांग्रेसले वरिष्ठ पत्रकार पदमराज जोशीलाई बागमती प्रदेशको डिजिटल प्रचारप्रसारको जिम्मेवारी दिएको छ ।
नजिकिँदै गरेको स्थानीय तह निर्वाचनको तयारीका लागि गठित प्रचार प्रसार समितिअन्तर्गत डिजिटल प्रचारतर्फको जिम्मेवारी जोशीले पाएका हुन् । प्रेस युनियनका नेता जोशीलाई कांग्रेसले अनलाइन मिडिया समन्वय तथा प्रचार प्रसार समिति बागमतीको संयोजक नियुक्त गरेको हो ।
जोशी दुई दशकभन्दा बढी समयदेखि पत्रकारितामा सक्रिय छन् । बैतडी घर भएका जोशीले काठमाडौंमा हेल्थ टुडे म्यागजिन र अनलाइन सञ्चालन गर्छन् ।
जोशी नेतृत्वको समितिको उपसंयोजकमा कुमार राउत नियुक्त भएका छन् ।
अनलाइन उपसमितितर्फ प्रदेश १ मा कुमार लुइँटेल संयोजक र आत्माराम राजवंशी उपसंयोजक नियुक्त भएका छन् ।
मधेस प्रदेशमा गुरु गौतम र श्रमन देव नियुक्त भएका छन् । गण्डकी प्रदेशमा टंक अधिकारी र सोनी शर्माले जिम्मेवारी पाएका छन् । लुम्बिनीमा रेखा भुसाल र नारायण खड्काले संयोजक र उपसंयोजकको जिम्मेवारी पाएका छन् ।
अनलाइन मिडिया समन्वय तथा प्रचार प्रसार उपसमितिको राष्ट्रिय संयोजकमा वरिष्ठ पत्रकार विष्णु निष्ठुरी रहेका छन् ।
