काठमाडौं । भारतीय गुप्तचर संस्था रिसर्च एण्ड एनालाइसिस विङ (रअ) का प्रमुख सामन्तकुमार गोयल छद्म भेषमा नेपाल आएर फर्केका छन् । गोप्य राखिएको उनको भ्रमणले नेपाली राजनीतिमा भने तरंग पैदा गराएको छ ।

कार्तिक ५ गते दिउँसो उनी आईएफबी ६०४५ कल साइनको चार्टर्ड उडानबाट नेपाल आएका थिए । र, सोही उडानबाट कार्तिक ६ गते बिहान स्वदेश फर्केका छन् । नेकपाभित्र विवाद बढीरहेको समयमा गरिएको गोयलको भ्रमणलाई निकै अर्थपूर्ण रुपमा हेरिएको छ ।

उनको भ्रमण व्यक्तिगत भने पनि उनले नेपालका प्रधानमन्त्री खड्ग प्रसाद ओली तथा राष्ट्रपति विद्यादेबी भण्डारीसँग गोप्य भेटवार्ता भएको श्रोतको दाबी रहेको छ । उनले प्रधानमन्त्री ओलीसँग दुइ घण्टा लामो भेटवार्तालाई निकै महत्वका साथ हेरिएको छ ।

भारतसँगको सिमाना विवाद बढी रहेको र नेपालमा चीनको प्रभाव बढ्दै गइरहेको अवस्थामा उनको भ्रमणलाई निकै चासोको रुपमा लिइएको छ । पछिल्लो समयमा नेपाल भारत सम्बन्धमा चिसोपन रहँदै आइरहेको छ ।

उनको भ्रमणलाई निकै गोप्य राखिएको छ । नेपालस्थित भारतीय राजदूतावासले अनभिज्ञता जनाएको छ । नेपालको परराष्ट्र मन्त्रालयले पनि उनी नेपाल आएको पुष्टि गरेको छैन् ।

तर उनले प्रधानमन्त्रीदेखि राजनीतिक दलका उच्च नेतालाई भेटेको भन्ने समाचार बाहिर आएको छ । तर नेकपाका दुइ नम्बर अध्यक्ष पुष्पकमल दाहालले भने आफू कुनै भेट नगरेको जनाएका छन् ।