काठमाडौँ । बालुवाटारमा प्रधानमन्त्री केपी शर्मा ओली र भारतीय स्थल सेनाध्यक्ष मनोज मुकुन्द नरवणेको शिष्टाचार भेट वार्ता भएको छ । बालुटारमा भएको शिष्टाचार भेट वार्तामा प्रधानमन्त्री ओलीले भारतसँग रहेका समस्या संवादमार्फत् समाधान हुने विश्वास व्यक्त गरेका छन् । बालुवाटार पुगेका भारतीय स्थल सेनाध्यक्ष नरवणेलाई प्रधानमन्त्री ओलीले भारत र नेपालबीच असल मित्रता रहेको समेत बताए ।
“भेटवार्ताका क्रममा प्रधानमन्त्रीले नेपाल र भारतबीच असल मित्रता रहेको र कतिपय विषयमा दुई देशबीच रहेका समस्या संवादमार्फत् समाधान हुने विश्वास व्यक्त गर्नुभयो,” प्रधानमन्त्रीका विदेश मामिला सल्लाहकार राजन भट्टराईले समाजिक सञ्जाल ट्वीटरमा उल्लेख गरेका छन् ।
भारतले गत वर्ष जारी गरेको नयाँ नक्सामा नेपाली भूमि कालापानी, लिपुलेख र लिम्पियाधुरालाई आफ्नो भागमा देखाएपछि नेपाल र भारतबीच विवाद बढेको थियो । वर्ष भारतले उक्त क्षेत्र हुँदै कैलाश मानसरोवर जाने लिंक रोड निर्माण गरेपछि झन् नेपाल र भारतबीच सीमालाई लिएर विवाद बढेको थियो ।
