काठमाडौं । नेपाली कांग्रेसको १४ औं महाधिवेशन शुरु हुने करिब महिना दिन मात्र बाँकी रहँदा पार्टी नेताहरुले भेटघाट र छलफलमा दौडधूप बढाएका छन् । कांग्रेस नेतृत्वको बागडोर सम्हाल्न जोड घटाउन र समीकरणको चर्चाले गाउँघर मात्र होइन, राष्ट्रिय मिडियादेखि सामाजिक सञ्जालसमेत भरिभराउछन् ।

महाधिवेशन लक्षित गरेर पार्टी सभापति शेरबहादुर देउवाले भेटघाट सुरु गरेपछि अन्य नेताहरुले पनि न्वारनदेखिको बल निकायलेर अभियानमा जुटेका छन् । यसपटक संस्थापन र संस्थापन इतर भनेर खासै चर्चा भएको छैन । प्रकाशमान सिंह, डा.शशांक कोइराला र विमलेन्द्र निधिको समीकरणले पछिल्लो समय चर्चा यतिबेला चर्चाको शिखर चुमेको छ ।

यी तीनजनाबाट साझा उम्मेदवार छान्ने प्रयास भइको छ । यसका लागि हिजोआज खुबै छलफल बहस भइरहेको छ । त्यो भित्री रुपमा छलफल कसरी तयारी भएको चुरो कुरो बाहिर आएको छैन । तर, बाहिर सार्वजनिक हुँदा कार्यकर्तालाई सकरात्मक सञ्चार प्रवाह हुने अभिव्यक्ति यी तीनजनाले दिने गरेका छन् ।

उता, वरिष्ठ नेता रामचन्द्र पौडेलले पनि आफ्ना सहयोगीसँग भेटघाटमा व्यस्त छन् । सिंह, निधि र कोइरालाको तुलनामा पौडेलको भेटघाट त्यत्ति तेजिलो देखिँदैन । कोरोनाका कारणले पनि पनि उनले चाहेजसरी भेटघाट गर्न नपाएको उनका सहयोगीहरु बताउँछन् । आफूभन्दा पनि दोस्रो पुस्ताका नेताहरुको सक्रियताले पौडेलको भेटघाट ओझेलमा परेको देखिन्छ ।

नेपाली कांग्रेसका अगाडिका महाधिवेशनमा संस्थापन पक्ष र संस्थापन इतर पक्षको निर्णायक प्रतिस्पर्धा हुन्थ्यो भने यसपालि त्यस्तो देखिएको छैन । अहिलेसम्मको अवस्थालाई हेर्दा दोस्रो पुस्ताका नेतात्रयबाट नेतृत्वको लागि केन्द्रित रहेर भेटघाट र छलफल तीब्र पारिएको देखिन्छ ।