काठमाडौँ । आजभन्दा १५ दिनअघि शेयर बजारमा अहिलेसम्मकै सर्वाधिक झण्डै १९ अर्ब ४२ करोड रुपैयाँबराबरको सेयर किनबेच भएको थियो । दुई हप्तापछि हिजो बुधबार पाँच अर्ब ७२ करोड बराबरको शेयर किनबेच भएको छ । बुधबार म्युचुअल फन्डका एकाइसहित २२० कम्पनीको एक करोड ६२ लाख कित्ता पाँच अर्ब ७२ करोड रुपैयाँमा किनबेच भएको छ ।

यसअघि गत वैशाख २८ गते सबैभन्दा कम ५ अर्ब ६६ करोड रुपैयाँको सेयर किनबेच भएको थियो । बुधबार सेयर बजारमा सामान्य गिरावट आई चार दशमलव १३ अंकले घटेर नेप्से परिसूचक २८२३.८७ बिन्दुमा पुगेको हो । नेप्से सामान्य अंकले घट्दा पनि पाँच कम्पनीको सेयर मूल्यमा उच्च वृद्धि भएको छ । जसमा, कर्णाली विकास बैंक, श्री इनभेष्टमेन्ट फाइनान्स र पोखरा फाइनान्सको सेयर मूल्य बढेको छ ।

नेपाल फाइनान्स, सेन्ट्रल फाइनान्स, मल्टिप्रोपोज फाइनान्स र प्रोग्रेशिभ फाइनान्सको सेयर मूल्यमा ९ प्रतिशतभन्दा बढी दरमा वृद्धि भएको छ । कारोबारमा आएका १३ समूहमध्ये ६ समूहका परिसूचकमा वृद्धि भएको छ । विकास बैंक र फाइनान्स समूहका परिसूचकमा उच्च वृद्धि भएको छ । पाँच अर्ब ८३ करोड रुपैयाँ बराबर सेयर कारोबार भएको छ । ६८ हजार एक सय ९२ पटकको कारोबारमा एक करोड ६२ लाख कित्ता किनबेच भएको छ ।