काठमाडौं । इन्टरनेट सेवा प्रदायक कम्पनी सीजी नेटले आक्रामक ढंगले बजार विस्तार गर्न थालेको छ । सीजी ग्रुपद्वारा सञ्चालित इन्टरनेट सेवाप्रदायक कम्पनीले महिनाको ९९९ रुपैयाँमा १२० एमबीपीएस सिजी नेट उपलब्ध गराउन लागेको हो ।

इन्टरनेट सेवा प्रदायक कम्पनीमा कान्छो मानिएको सीजी नेटले आफ्नो सेवा क्षेत्र पनि बढाउँदै लगेको छ । कम्पनीले दुईसाता भित्र काठमाडौंका विभिन्न ६ स्थानमा सेवा बिस्तार गरिसक्ने जनाएको छ । यहिं साउन २३ देखि भदौ ३ सम्ममा सतुंगल, महराजगञ्ज, बालाजु, छाउनी, कोटेश्वर र कलंकीमा सेवा विस्तार गर्ने कम्पनीले प्रतिवद्धता जनाएको छ ।

यसअघि सीजी गु्रपले जेठ १८ देखि औपचारिक रुपमा ललितपुरको जावलाखेल, झम्सिखेल लगायतका स्थानबाट फाइबर इन्टरनेट सेवा सुरु गरेको थियो । गत असार ३१ बाट सिजी नेट काठमाडौं प्रवेश गरेको हो ।

काठमाडौंको कुलेश्वर, बल्खु, कालिमाटी, टेकु, त्रिपुरेश्वरसहितका क्षेत्रमा सीजी इन्टरनेट प्रयोगमा आइसकेको छ । सीजी नेटले उपभोक्ताहरुलाई सेवा प्रारम्भको अफरस्वरुप (इन्ट्रडक्टरी अफर) तत्काल १२० एमबीपीएसको प्याकेज मात्रै सार्वजनिक गरेको छ ।

यो प्याकेज १, ३, ६ र १२ महिनामा उपलब्ध गराएको छ । आवासीय र व्यापारिक दुवै प्रयोजनका लागि उपभोक्ताहरुले यो सेवा लिन सक्ने जनाइएको छ । खरिद गर्दा जडान र ड्रप–वायर (नजिकको प्वइन्टदेखि घरसम्म जोड्ने तार) को शुल्क भने तिर्नुनपर्ने जनाइएको छ ।

सिजी नेटले उपभोक्ताहरुलाई १२० एमबीपीएस स्पीडको मूल्य एक महिनाको भ्याटबाहेक ९९९ रुपैयाँ मात्रै रहेको कम्पनीद्वारा जारी विज्ञप्तिमा उल्लेख छ ।