काठमाडौं । माओवादी केन्द्रको स्थायी समिति बैठक पार्टी केन्द्रीय कार्यालय पेरिसडाँडा कोटेश्वरमा बसेको छ । संघीय सरकारमा जाने मन्त्रीहरूको नाम टुंगो लगाउन र समसामयिक राजनीतिक विषयमा छलफल गर्न पार्टी अध्यक्ष पुष्पकमल दाहाल प्रचण्डले स्थायी समिति बैठक बोलाएका हुन् ।

लुम्बिनी प्रदेशमा सत्ताको नेतृत्व हात पारेपछि माओवादी केन्द्रको स्थायी समिति बैठक पहिलो पटक बसेको हो । बैठकमा प्रचण्ड, नारायणकाजी श्रेष्ठ, कृष्णबहादुर महरा, हरिबोल गजुरेल, देवेन्द्र पौडेल, जनार्दन शर्मा, पम्फा भुसाल, वर्षमान पुनलगायत नेताहरुको उपस्थिति रहेको छ ।

बैठकमा माओवादी नेताहरू अरु दिनको तुलनामा आज उत्साहित देखिन्थे । लुम्बिनी प्रदेशमा नसोचेको सफलता हात पारेपछि नेताहरूमा खुसियाली छाएको हो ।

लुम्बिनीमा माओवादी स्थायी समिति सदस्य कुलबहादुर केसी मुख्यमन्त्री बनेका छन् । योसँगै तीनवटा प्रदेशमा माओवादी नेतृत्वको सरकार बनेको छ । संसदको तेस्रो ठूलो दलले तीन–तीनवटा प्रदेशमा सरकार बनाउन सफलता पाउनु ठूलै प्रगति मानिन्छ ।