कैलाली । प्रदेश सभाको निर्वाचनपछि बसेको प्रदेश नम्बर ७ को पहिलो बैठकले माघ २९ गते प्रदेशसभा सभामुखको चुनाव गर्ने निर्णय गरेको छ । पहिलो बैठक ज्येष्ठ सदस्य दिश्यश्वरी शाहको अध्यक्षता बसेको पहिलो बैठकले प्रदेश सभाको अन्तरिम कार्य सञ्चालन कार्यविधि समेत पारित गरेको छ । बैठक जिल्ला समन्वय समितिको सभा हलमा प्रदेश सभाको पहिलो बैठक सम्पन्न भएको हो ।
बैठकले सभामुख र उपसभामुख चयन नहुँदासम्म संसद सञ्चालनका लागि ५ सदस्यीय कार्य समिति चयन गरेको छ । जसमा माया भट्ट, देवराज पाठक, विरमान चौधरी, पुर्णा जोशी र कृष्णबहादुर चौधरी रहेका छन् ।
बैठकमा नेकपा एमाले, नेपाली कांग्रेस, माओवादी केन्द्र र राष्ट्रिय जनता पार्टीका प्रदेश सदस्यहरुले धारणा राखेका थिए ।
बैठकलाई सम्बोधन गर्दै एमालेका प्रकाश शाह, माओवादी केन्द्रका त्रिलोचन भट्ट र नेपाली कांग्रेसका भरत खड्काले प्रदेश नम्बर ७ सम्भावनाको खानी रहेको भन्दै त्यहाँका सबैखाले सम्भावनाहरुको अध्ययन गरी योजना बनाउनु पर्नेमा जोड दिए ।
अधिकांश बोल्ने विधायकले सुदूरपश्चिकमको विकासको ढोका खुलेको बताएका थिए । उनीहरुले सुदूरपश्चिममा पर्यटन, कृषि तथा उद्यमशीलतामा जोड दिएका थिए ।
