काठमाडौं । सभामुख निर्वाचित भएपछि आफू संलग्न दल नेकपा (माओवादी) केन्द्रको सदस्यता त्यागेका नेता अग्नी प्रसाद सापकोटा पार्टीको उपाध्यक्षमा चयन भएका छन् । त्यसका साथै उपमहासचिव पम्फा भुसाल पनि सोही पदमा चयन भएकी छिन् ।
हालै सम्पन्न स्थायी कमिटी बैठकको निर्णयअनुसार दुई नेतालाई उपाध्यक्षमा मनोनित गरिएको भएपनि बैठकको निणर्य गोप्य राखिएको थियो ।
यसअघि माओवादीले वरिष्ठ उपाध्यक्षमा नारायणकाजी श्रेष्ठ र उपाध्यक्षमा कृष्णबहादुर महरालाई चयन गरेको थियो ।
उपमहासचिवमा पम्फासँगै हरिबोल गजुरेल, जनार्दन शर्मा, वर्षमान पुन, गिरिराजमणि पोखरेल, मातृका यादव र शक्ति बस्नेत चयन थिए भने पम्फाको भने बढुवा भएको हो ।
यसैगरी सचिवमा गणेश साह, दिनानाथ शर्मा, चक्रपाणी खनाल, देवेन्द्र पौडेल, लिलामणी पोखरेल, हितराज पाण्डे, हितमान शाक्य, राम कार्की र डिलाराम आचार्य रहेका छन् भने कोषाध्यक्षमा श्रीराम ढकाल रहेका छन् ।
