महेन्द्रनगर । जिल्ला प्रशासन कार्यालय कञ्चनपुरले महेन्द्रनगरमा जारी गरेको कर्फ्यु आदेश शनिवार पनि हटाइएको छैन् । सुशान महेन्द्रनगरबजार बिहानैबाट आन्दोलित भएको छ । शुक्रवार प्रहरीको गोली लागेर एक जनाको मृत्यु भएपछि अवस्था गम्भिर बन्दै गइरहेको स्थानीयले बताएका छन् ।

जिल्ला प्रहरी कार्यालयका प्रमुख प्रहरी उपरिक्षक कुवेर कडायतले भीमदत्त नगरपालिका क्षेत्रमा जारी गरिएको कर्फ्यु यथावथ रहेको जानकारी दिए । प्रहरीको गोली लागेर भीमदत्त नगरपालिका १८ निम्बुखेडाका १८ वर्षिय शन्नी खानको मृत्यु भएपछि प्रशासनले कफ्यु आदेश जारी गरेको हो ।

महेन्द्रनगरबाट शुरु भएको आन्दोलन सुदूरपश्चिमका पहाडी जिल्लामा शुरु भएको छ । डोटी, बैतडी, डडेल्धुरा लगातका स्थानमा प्रर्दशन भइरहेको छ । डोटीमा बिहानैबाट आन्दोलन शुरु भएको गणेश खडेकाले जनाएका छन् । ठूलो उपस्थिति रहेको बिरोध कार्यक्रम हत्यारालाई पक्राउ गर्न र मृतकका परिवारलाई क्षतिपूर्ति दिन माग गरेको खड्काले जनाए ।