काठमाडौं । किर्तिपुरस्थित टीयु क्रिकेट मैदानमा मंगलबार सम्पन्न एसीसी प्रिमियर कपमा युएईलाई हराउँदै नेपाल पहिलोपटक एशिया कप क्रिकेटका लागि छनौट भएको छ । एसीसी प्रिमियर कपको फाईनलमा युएईमाथि ७ विकेटको शानदार जित निकाल्दै नेपालले उपाधि समेत जितेको हो ।
युएईले दिएको ११८ रनको सामान्य लक्ष्य नेपालले ३०।३ ओभरमा जम्मा ३ विकेटको क्षतिमा भेट्टायो । नेपालको जितमा युवा अलराउण्डर गुल्शन झाले संकटमोचकको भुमिका निर्वाह गरे भने उनलाई भिम सार्कीले शानदार साथ दिएका थिए । यी दुई ले नटआउट ९६ रनको साझेदारी गरे ।
गुल्शनले ८४ बलमा ३ चौका र ६ छक्का हिर्काउँदै नटआउट ६७ रन बनाए भने भिम सार्कीले ७२ बलमा नटआउट ३६ रनको योगदान गरे । नेपालले २२ रनको अवस्थामा आफ्नो महत्वपूर्ण तिन विकेट गुमाईसकेको थियो । कुशल भुर्तेल १, आशिफ शेख ८ र कप्तान रोहित पौडेल १ रन बनाउँदै पभिलियन फर्किएका थिए ।
बलिङ्गमा युएईका लागि रोहन मुस्तफाले २ र आयान अफ्जल खानले १ विकेट हात पारे । टस हारेर पहिलो ब्याटिङ्ग गरेको युएईको टोलिले फितलो प्रदर्शन गर्दै ३३।१ ओभरमा अलआउट हुँदै जम्मा ११७ रनको योगफल तयार पारेको थियो ।
आशिफ खानले सर्वाधिक ४६ रन बनाउनुबाहेक अन्य कुनै पनि ब्याट्सम्यानले उम्दा प्रदर्शन गर्न सकेनन् । बलिङ्गमा नेपालका लागि ललित राजवंशीले ४ विकेट लिए भने करण केसी र सन्दीप लामिछानेले समान २–२ विकेट चट्काए । यस्तै सोमपाल कामी र गुल्शन झाले एक एक विकेट हात पारेका थिए ।
यो जितसँगै एशिया कपका लागि छनौट भएको नेपालले भारत र पाकिस्तान रहेको समूह ‘ए’ मा रहँदै खेल्नेछ । एशिया कप २०२३ आगामी सेप्टम्बरमा पाकिस्तानमा हुनेछ ।
