काठमाडौं । नेपाली कांग्रेसका केन्द्रीय सदस्य एवम सूचना, सञ्चार तथा प्रचार विभाग प्रमुख मीन विश्वकर्माले गणेशमान सिंह साहसी, लोभलाचलबिहिन र राजनीतिक नेतृत्व गर्न सक्ने नेता भएको बताएका छन्। उनले गणेशमानको नेतृत्व नभएको भए २०४६ सालको जनआन्दोलन सफल सम्भव हुँदैनथ्यो भने।
सर्वमान्य नेता सिंहको २६औँ स्मृति दिवसको अवसरमा नेपाली कांग्रेस जिल्ला कार्यसमिति ललितपुरद्वारा आज यहाँ आयोजित ‘गणेशमान सिंह र समावेशी नेपालको परिकल्पना’ कार्यक्रममा नेता विश्वकर्माले गणेशमानले नेतृत्व गरेकै कारण काठमाडौँ उपत्यका जागरुक भएको उल्लेख गर्दै उनी विकृति र विसङ्गति देखेर सबै किसिमका सुख सयल त्यागेर घर छोडेर आन्दोलनमा लागेको राजनेता भएको बताए।
कार्यक्रममा नेपाली कांग्रेस ललितपुरका जिल्ला सभापति जितेन्द्रकुमार श्रेष्ठले कमजोरी सुधार गरेर सङ्गठन बलियो बनाउने गरी लाग्नुपर्ने बताए । नेता सिंहको २०५४ असोज २ गते देहावसान भएको थियो ।
