काठमाडौं । क्रिकेटर सन्दीप लामिछाने विरुद्धको मुद्धा आज पनि स्थगित भएको छ । नाबालिगमाथि बलात्कार गरेको अभियोगमा विचाराधीन रहेको मुद्धाको सुनुवाइ काठमाडौं जिल्ला अदालतमा आजका लागि तोकिएकोमा न्यायाधीश अभावका कारण स्थगित भएको हो ।

गोला प्रणालीबाट पेशी व्यवस्थापन हुने गरेको र फाँट नम्बर २८ को उक्त मुद्दाको गोला कुनै पनि न्यायाधीशले नतानेको कारण लामिछानेको मुद्दा स्थगितको सूचीमा परेको जानकारी जिल्ला अदालतका सूचना अधिकारी दीपक दाहालले दिए ।

९ जना न्यायाधीश अनुपस्थित रहेकाले ती फाँटहरूमा इजलास बस्ने छैन। ६ जना न्यायाधीश सरूवा भएर आउनै बाँकी रहेको र ३ जना न्यायाधीश बिदामा रहेको भनाइ दाहालको रहेको छ ।

सर्वोच्च अदालतले मुद्दालाई चाँडै टुंगो लगाउनु भनेपनि काठमाडौं जिल्ला अदालत यसबारे उदासिन देखिएको छ ।

बलात्कार भएको हो कि होइन भन्ने विवाद भएको यो मुद्दामा धेरैजसो न्यायाधीशले बालिकाको जन्म मितिसम्बन्धी कागज मगाउने मात्रै आदेश दिएर मुद्दा पन्छाउँदै गरे । साउन ३२ मा न्यायाधीश राजुकुमार खतिवडाले त पीडितकी आमाको जन्म मितिसमेत यकिन गर्ने आदेश दिएका थिए ।