काठमाडौं। कंचनपुरकी बालिका निर्माला पन्तको बलात्कार पछि हत्या काण्डमा बम दिदिबहिनी निर्दोष रहेको प्रहरीले प्रष्ट पारेको छ । 

नेपाल प्रहरीका प्रवक्ता प्रहरी बरिष्ठ उपरीक्षक उत्तमराज सुवेदीले निर्मला हत्या प्रकरणमा नाम मुछिएका बम दिदिबहिनीहरु निर्दोष रहेको बताएका हुन् । 

उनले भने, ‘नेपालको प्रचलित कानून र संविधानले पनि कानूनबमोजिम प्रमाणित नहुन्जेलसम्म उनीहरूलाई दोषी भन्न मिल्दैन । मलाई त कहिलेकाहीँ दुःख लाग्छ, यी कुराहरू नआईदिएको भए हुन्थ्योजस्तो लाग्छ । नेपाल प्रहरीको प्रवक्ताको हैसियतले मैले भन्दाखेरि निजहरूको विरुद्धमा कुनै प्रमाण अथवा अदालतले दोषी करार नगरुञ्जेलसम्म उहाँहरु निर्दोष हुन् । यो कुरा मैले भन्नैपर्छ ।’

प्रवक्ता सुवेदीले निर्मला बलात्कार पछि हत्या प्रकरण संगठनको लागि पनि प्रतिष्ठाको विषय भएकोले उच्च प्राथमिकताका साथ अनुशन्धान गरिरहेको समेत बताएका छन् । 

मंगलबार राजधानीमा आयोजित एक साक्षात्कारमा बोल्दै उनले भने, ‘यो प्रकरणमा हाम्रो संगठनले मेहनत र ईमानदारपूर्वक अनुशन्धान गरिरहेको छ । यो प्रकरण हाम्रो संगठनको लागि पनि प्रतिष्ठाको विषय हो । हामीले उच्च प्राथमिकताका साथ अनुशन्धान गरिरहेका छौं ।’