सुनकुडा । सुदूरपश्चिमका चेलीबेटीलाई अन्नी अर्थात् फाको (खानेकुरा सहितको कोसेली) दिने पर्व शुरु भएको छ । बिवाहित चेली आफ्नो घरमा रहँदा माइतीले अन्नी (अर्नी) दिने चलन रहेको छ । यो माघदेखि बैखाशसम्म रहने गर्दछ ।

आमाबुवा तथा दाजुभाईले माइतीबाट मिठाखानेकुरा पकाएर चेलीबेटीको घर जाने चलन रहेको छ । सुदूरपश्चिमका पहाडी जिल्लामा यो निकै प्रचलित चलनको रुपमा रहेको छ । माइतीले मिठामिठा खानेहरु कुराहरु बाबर, लौन (पुरी), माणा, प्वा (हलुवा), खीर लगायतका खानेकुरा पकाएर केसुली लाने चलन छ ।

बिवाहपछि माइतीबाट टाढा रहेको चेलीहरुलाई न्यास्रो नहोस भनेर माइती गएर भेटने र अन्नी दिने चलन रहेको छ । माइतीबाट निकै टाढा बिवाह भएकाहरुलाई बिशेष गरी अन्नी दिइन्छ ।

पहिलो चोटी बिवाह भएर गएका चेलीहरु पहिलो प्राथमिकता राखेर अन्नी दिने चलन छ । पहिलो पटक बिवाह भएकाहरुका लागि बिवाहित घर तथा समाज सबै नयाँनौलो भएका कारण पनि उसलाई दैनिक जीवनमा कठीनाई नहोस भनेर माइतीले कठीन महिना मानिने माघमा अन्नी दिने चलनछ ।

पछिल्लो समयमा आएर लूगा तथा अन्य उपहार पनि दिने गरिन्छ । पहिले संचार कुनै माध्यम नभएको हुनाले पनि माइती आफै गएमात्र भेटघाट हुने समस्या थियो । त्यही भएर माइतीहरु चेली भेट्न जाने चलन थियो ।

समय बदलिएको छ । संचारका नयाँ सुबिधाहरु आएका छन् । गाउँ गाउँमा सडक बिस्तार भएका छन्। यसले गर्दा त्यो चलन बिस्तारै हट्दै गएको देखिन्छ । बसाई सराई तथा रोजगारीको कारण पनि त्यो चलनमा कमी आएको हो । अहिले फोन सम्पर्क तथा सामाजिक संजाल मार्फत छिनछिनमा सम्पर्क हुने भएकाले त्यो चलन हट्दै गएको हो ।