नेपाली कांग्रेसका सांसद प्रदीप गिरीले नेपाली समाज नबुझ्ने अर्थमन्त्री भएकाले विकास हुन नसकेको आरोप लगाएका छन् ।
प्रतिनिधिसभामा आगामी आर्थिक वर्षको बजेटका सिद्धान्त र प्राथमिकतामाथिको छलफलमा भाग लिँदै सांसद गिरीले नेपालको बारेमा ज्ञान नभएका व्यक्तिहरू अर्थमन्त्री भएका कारण विकास हुन नसकेको बताएका हुन् ।
विगतमा कांग्रेसबाट प्रधानमन्त्री भएका व्यक्तिहरूका पालादेखि नै विदेशमा अध्ययन गरेर आएका व्यक्तिहरूलाई अर्थमन्त्री बनाउनुका कारण मुलुकको विकास हुन नसकेको बताए । लामो समययता कांग्रेसको समयमा पनि बाहिरबाट पढेर आएका पिएचडी गरेका गहुँ र धानको फरक थाहा नपाउने, प्याज र आलुलाई पानी चाहिन्छ कि चाहिँदैन भन्ने थाहा नपाउने अर्थमन्त्री बनाउँदा समस्या भएको बताए ।
उनले नेपालले आफ्नो मुलुक सुहाउँदो आर्थिक मोडेल बनाएर अगाडि बढ्न सुझाव दिए । कांग्रेस संसदीय दलका प्रमुख सचेतक बालकृष्ण खाँणले प्रतिपक्षी मिडिया काउन्सिल विधेयक फिर्ता लिन सरकारलाई आग्रह गरे । उनले संविधानको मर्म र भावनाविपरीत ल्याइएको भन्दै विधेयक फिर्ता लिन माग गरे ।
