महिला, बालबालिका तथा ज्येष्ठ नागरिकमन्त्री थममाया थापाले महिलाहरुलाई आर्थिक रुपमा सशक्त बनाउनुपर्ने बताएकि छिन् ।
म्याग्दीमा सञ्चालित राष्ट्रपति महिला उत्थान कार्यक्रमको स्थलगत अनुगमनपछि आयोजित समीक्षा कार्यक्रममा बोल्दै मन्त्री थापाले महिलालाई आयआर्जनका क्षेत्रमा लगाउनुपर्ने बताइन् ।
उनले समाजमा पछाडि परेका महिलाहरुलाई विभिन्न आयआर्जनका कार्यक्रमहरु सञ्चालन गरी आर्थिक रुपमा सक्षम र सशक्त बनाउनुपर्ने बताउँदै त्यसै अनुसार देशका ३० जिल्लामा राष्ट्रपति महिला उत्थान कार्यक्रम सञ्चालन गरिएको जानकारी दिईन् ।
भौतिक संरचनाको विकासले मात्रै केही नहुने हुँदा समाजमा पछाडि परेका वर्गको उत्थान गर्नुपर्नेमा जोड दिँदै उहाँले आर्थिक–सामाजिक रुपान्तरणसँगै शोषण, दमन, कुरीति र कु–संस्कारको अन्त्य गरी न्यायपूर्ण र समतामूलक समाजको निर्माण गर्नुपर्नेमा जोड दिईन् ।
उनले समाजमा रहेको अन्धविश्वास हटाउनका लागि सबै क्षेत्रबाट सचेतनामूलक अभियानहरु चलाउनुपर्ने बताईन् ।
