सुदूरपश्चिम प्रदेशको पहाडी जिल्ला डोटीमा डेंगुको संक्रमणबाट एक जनाको मृत्यु भएको छ ।
डेंगु संक्रमित दीपायल सिलगढी नगरपालिका वडा नम्बर ६, थापलाकी ४२ वर्षीया छत्र मलासीको उपचारका क्रममा बिहीबार मृत्यु भएको हो । टाउको दुख्ने,ज्वरो आउने समस्यापछि माया मेट्रो अस्पताल, कैलालीमा भर्ना भएकी मलासीको उपचारका क्रममा मृत्यु भएको अस्पतालले जनाएको छ ।
माया मेट्रो अस्पतालका डा. विष्णु जोशीले डेंगुको संक्रमण अत्यधिक भएकाले मलासीलाई बचाउन नसकिएको बताए । डोटीमा डेंगुको संक्रमणबाट मृत्यु भएको यो पहिलो घटना हो । घटनासँगै डोटीका स्थानीयमा त्रास फैलिएको छ । यद्यपि, जिल्ला अस्पताल डोटीमा भने अहिलेसम्म कसैलाई पनि डेंगुको संक्रमण नभएको चिकित्सक डा. भूषण मिश्रले बताए ।
नेपालको पूर्वी भागमा देखिएको डेंगु विस्तारै डोटी, कैलालीलगायतका जिल्लामा पनि देख्न थालिएको छ ।
