पश्चिमी वायुको प्रभावले उच्च पहाडी तथा हिमाली क्षेत्रमा भारी हिमपात भएको छ ।

यो वर्ष आठ वर्षयता सबैभन्दा चाँडो हिमपात भएको हो । विगतका वर्षमा पुषको पहिलो सातामात्र हिमपात हुने गरेको भएपनि यसवर्ष मंसिरको अन्तिम हप्तानै हिमपात भएको हो ।

हिमपातका कारण मुगु, हुम्ला, डोल्पालगायत उच्च पहाडी तथा हिमाली जिल्लाको जनजीवन प्रभावित भएको छ । हु्म्लाको विमानस्थल नै अवरुद्ध भएको छ । अबको दुई दिनसम्म उच्च पहाडीसहित हिमाली भूभागका हल्कादेखि मध्यम हिमपात हुने सम्भावना रहेको मौसम पूर्वानुमान महाशाखाका मौसमविद् शान्ति कँडेलले जानकारी दिईन् ।

पश्चिमी वायुको प्रभाव तथा मौसमी प्रभावका कारण नै अहिलेको मौसममा परिवर्तन देखिएको बताउँदै उनले मुलुकभरि सामान्यदेखि पूर्ण बदली रही केही स्थानमा हल्का वर्षा हुने सम्भावना रहेको बताईन् ।

त्यसैगरी शुक्रबार राति देशभर सामान्यदेखि पूर्ण बदली रही पश्चिमी भेगका धेरै स्थानका साथै मध्य तथा पूर्वका केही स्थानमा हल्का वर्षा हुने सम्भावना महाशाखाले जनाएको छ ।